Bu gecə Bakıda bir sıra yollarda avtomobillərin hərəkət istiqaməti dəyişdiriləcək

Oktyabrın 26-dan 27-nə keçən gecə saat 2-dən 6 radələrinədək COP29 tədbirinə hazırlıq məqsədi ilə paytaxtın bəzi küçə və prospektlərində nəqliyyatın idarə edilməsi üzrə monitorinqlərin keçirilməsi üçün məhdudiyyətlər tətbiq edilməklə avtomobillərin hərəkət istiqaməti dəyişdiriləcək.

Bu barədə Oxu.Az-a Bakı Şəhəri Dövlət Yol Polisi İdarəsindən (BDYPİ) məlumat verilib.

Bildirilib ki, hava limanı istiqamətinə alternativ yol kimi sürücülər metronun "20 Yanvar" stansiyası, Ziya Bünyadov, Qara Qarayev prospekti, "Nargilə dairəsi" kimi tanınan ərazidən Zığ yoluna keçməklə hərəkət edə bilərlər.

Bilgəh Kardioloji Sanatoriyasından Hava limanı istiqamətində məhdudiyyət tətbiq olunduğundan sürücülər Maştağa qəsəbəsi, Albalılıq ərazisi və Qala dairəsindən Zığ şosesinə keçməklə hərəkət edə bilərlər.

Cənubdan mərkəzə doğru, yəni Azneft dairəsi və Neftçilər prospektinə alternativ kimi isə sürücülər Bakı-Salyan yolunun 14-cü kilometrliyindən Lökbatan dairəsi istiqamətində üçüncü Kənar Dairəvi Yolla "20 Yanvar" və ya Yeni Yasamal ərazisindən keçməklə daxil ola bilərlər.

Sürücülərdən monitorinq müddətində müəyyən istiqamətlər üzrə nəqliyyat vasitələrinin hərəkətinə tətbiq olunacaq məhdudiyyətləri nəzərə almaları xahiş olunur.

10:06

Oktyabrın 26-dan 27-nə keçən gecə saat 2:30-dan 5:30-dək Bakıda bir sıra küçə və prospektlərdə avtomobillərin hərəkət istiqaməti dəyişdiriləcək.

Oxu.Az xəbər verir ki, bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən (AYNA) məlumat verilib.

Bildirilib ki, buna səbəb BMT-nin İqlim Dəyişmələri üzrə Çərçivə Konvensiyasının Tərəfləri Konfransının 29-cu sessiyası (COP29) tədbirinə hazırlıq məqsədilə nəqliyyatın idarəedilməsi üzrə monitorinqlərin keçirilməsidir.

"Heydər Əliyev Beynəlxalq Aeroportuna gedəcək vətəndaşlardan 8 Noyabr prospekti və Zığ Şosesi, həmçinin Novxanı, Zuğulba, Mərdəkan yolundan istifadə etmələri xahiş olunur," - deyə məlumatda qeyd edilib.

Bu gecə Bakıda bir sıra yollarda avtomobillərin hərəkət istiqaməti dəyişdiriləcək