"Qurban Qurbanov" teqi üzrə xəbərlər
Azərbaycan futbolunun əfsanəvi siması Qurban Qurbanov 1972-ci il aprelin 13-də Zaqatala rayonunun Aşağı Tala kəndində dünyaya göz açıb. Gənc yaşlarından futbola olan həvəsi onu bu idman növünə bağlayıb və gələcək karyerasının təməlini qoyub.
Qurbanov futbolçu kimi çıxış etdiyi 1990-2005-ci illər ərzində "Daşqın", "Turan", "Kür-Nur", "Neftçi", "İnter" kimi Azərbaycan klubları ilə yanaşı, Gürcüstan və Rusiyanın bir sıra komandasında da forma geyinib. Dörd dəfə Azərbaycan çempionu və bir dəfə kubok qalibi olan hücumçu, 1996/97 mövsümündə 34 qolla çempionatın ən yaxşı bombardiri adını qazanıb. Ölkə çempionatlarında 115 dəfə fərqlənən Qurbanov, Azərbaycan Premyer Liqasının tarixində 4-cü ən yaxşı bombardir hesab olunur.
Qurbanovun uğurları təkcə klub səviyyəsində deyil, milli komandada da özünü göstərib. O, 68 oyunda milli formanı geyinərək 14 qol vurub və bu göstərici ilə yığmanın ən məhsuldar futbolçusu kimi tarixə düşüb.
Futbolçu karyerasını başa vurduqdan sonra məşqçiliyə keçid edən Qurbanov, ilk olaraq 2005-ci ildə "İnter"də idman direktoru kimi fəaliyyətə başlayıb. 2006-2007-ci illərdə isə "Neftçi"nin baş məşqçisi olub.
Lakin Qurban Qurbanovun ən böyük uğurları "Qarabağ"la bağlıdır. 2008-ci ildən bu klubu çalışdıran məşqçi, komandanı 10 dəfə Azərbaycan çempionu, 5 dəfə isə ölkə kubokuna sahib edib. Onun rəhbərliyi altında "Qarabağ" ardıcıl 10 dəfə Avropa kubokların qrup mərhələsinə yüksəlib. 2017-2018-ci illər mövsümündə isə Çempionlar Liqasının qrup mərhələsində mübarizə aparan ilk Azərbaycan klubu olub.
2021-2022 və 2022-2023 mövsümlərində Konfrans Liqasında, 2023-2024 mövsümündə isə Avropa Liqasında "Qarabağ", Qurbanovun rəhbərliyi altında pley-off mərhələsinə adlayaraq 1/8 finala qədər yüksəlib.
Qurban Qurbanov 2017-2018-ci illərdə Azərbaycan milli komandasının baş məşqçisi kimi də çalışıb. Onun zəngin karyerası və xidmətləri dövlət tərəfindən yüksək qiymətləndirilib. 2011-ci ildə "Əməkdar məşqçi" fəxri adına layiq görülən Qurbanov, 2022-ci ildə Prezident İlham Əliyev tərəfindən "Şöhrət" ordeni ilə təltif edilib.
Qurban Qurbanovun həyat və karyera yolu gənc futbolçular üçün əsl motivasiya mənbəyidir. O, əzmkarlığı və çalışqanlığı ilə futbol tarixində silinməz izlər qoyub.
