"Qarabağ"ın məğlubiyyəti Azərbaycanın UEFA əmsallar cədvəlindəki yerinə təsir edibmi?

Çempionlar Liqası və Konfrans Liqasında baş tutan matçlardan sonra bəzi ölkələrin xal hesabı dəyişib. Bu, Azərbaycanın mövqeyinə təsir etməyib.

Oxu.Az xəbər verir ki, "Qarabağ" Zaqrebdə "Dinamo"ya 0:3 hesabı ilə uduzub. Bu üzdən xal hesabımız da dəyişməyib.

Hazırda Azərbaycanın 18.875 xalı var. Ölkəmiz Avropada 26-cı pillədədir. Ən yaxın rəqiblərimizin də xal ehtiyatı dəyişməyib - bir pillə öndəki Kiprin aktivində 18.975 xal var, ən yaxın təqibçimiz Bolqarıstan isə 18.375 xal toplayıb.

Cari mövsümün qazancı 2.125-ə bərabərdir. Ölkə reytinqi üçün "Zirə" 1.000 xal, "Qarabağ" 0.750 xal, "Sabah" 0.250 xal və "Sumqayıt" 0.125 xal əldə edib.

Qeyd edək ki, cədvələ İngiltərə başçılıq edir - 89.160 xal.