"Microsoft" "Windows 11" və "Windows 10"da istifadəçiləri ümumi "Wi-Fi" şəbəkələrinə qoşulduqda risk altına sala biləcək kritik zəiflik müəyyən edilib.
Bu barədə "The Register" xəbər verir.
Nasazlıq (CVE-2024-30078) hakerlərə ictimai istifadə yerlərində, məsələn, hava limanlarında, kafelərdə, mehmanxanalarda və ofislərdə eyni şəbəkəyə qoşulmuş cihazlarda zərərli paketləri işə salmağa imkan verir. Hücumçular istənilən autentifikasiya və ya istifadəçi ilə qarşılıqlı əlaqə olmadan sistemə uzaqdan əmrlər yerinə yetirə və giriş əldə edə bilirlər.
Şirkət rəhbərlərinin sözlərinə görə, problem əməliyyat sisteminin yenilənməsində aradan qalxıb.
Qeyd edək ki, "Windows 11" "Microsoft"un ən yeni əsas əməliyyat sistemi versiyasıdır, 5 oktyabr 2021-ci ildə buraxılıb. O "Windows 10"un (2015-ci ildə buraxılıb) əvəzinə gəlib və bu əməliyyat sisteminin olduğu istənilən cihaz üçün pulsuzdur.
