14 oktyabr 2024-cü ildə Polşanın paytaxtı Varşava şəhərində keçirilən "Qərbi Azərbaycan - yaddaşlarımızda" adlı sərgi çərçivəsində Qərbi Azərbaycan İcmasının İctimaiyyətlə Əlaqələr və Qərbi Azərbaycan Televiziyası şöbəsinin müdiri - Sözçüsü Ülviyyə Zülfiqar Polşa -Azərbaycan Parlament qrupunun sədri Pşemislav Viteklə görüşüb.
Bu barədə Oxu.Az-a Qərbi Azərbaycan İcmasından məlumat verilib.
Bildirilib ki, icma rəsmisi Pşemislav Vitekə Qərbi Azərbaycanlıların ötən əsrdə mərhələlərlə deportasiyaya məruz qalmalarından, Ermənistan ərazisində soydaşlarımıza məxsus zəngin irsin məhv edilməsindən danışıb.
Qeyd olunub ki, zorla öz ata-baba yurdlarından çıxarılan qərbi azərbaycanlılar beynəlxalq hüququn norma və prinsiplərinə əsasən qayıdış hüququna malikdirlər.
Ülviyyə Zülfiqar vurğulayıb ki, Qərbi azərbaycanlılar bu gün öz ata-baba yurdlarına geri qayıtmaq həsrəti ilə yaşayırlar.
Polşa parlamentinin nümayəndəsi ona verilən məlumatları maraqla qarşılayaraq beynəlxalq hüququn prinsipi olaraq qayıdış hüququnun həyata keçirilməsinin önəmini qeyd edib.
Qeyd edək ki, görüş barədə polşalı deputat da öz "Facebook" səhifəsində paylaşım edərək "Qərbi Azərbaycan - yaddaşlarımızda adlı sərgidən hər birinizi salamlayıram" yazıb.
