2024-cü ildə dünya birliyi beynəlxalq əməkdaşlığın mühüm mərhələsinə qədəm qoyur və bu, Rio Konvensiyaları çərçivəsində tərəflərin üç əsas konfransının - iqlim, biomüxtəliflik və səhralaşma ilə bağlı tədbirlərin keçirilməsi ilə əlamətdardır.
"Report" xəbər verir ki, bu barədə Sloveniya, Kabo Verde, Kosta Rika, Sinqapurun xarici işlər nazirləri və BƏƏ-nin ekologiya və ətraf mühit nazirinin daxil olduğu Yaşıllar Qrupunun bəyanatında deyilir.
"Bu tədbirlər planetin əsas problemlərinin - biomüxtəlifliyin itirilməsi, iqlim dəyişikliyi və ətraf mühitin çirklənməsinin həllinə yönəlib. Mütəxəssislər xəbərdarlıq edir ki, təcili və koordinasiyalı tədbirlər olmasa, bu təhdidlər yaxın onilliklərdə həyat keyfiyyətini əhəmiyyətli dərəcədə aşağı sala bilər", - sənəddə vurğulanır.
Dayanıqlı inkişafın əsas elementi kimi qəbul edilən su təhlükəsizliyi məsələlərinə xüsusi diqqət yetiriləcək. Qlobal iqlim dəyişikliyi şəraitində su çatışmazlığı qida təhlükəsizliyi və ekosistemin dayanıqlılığı üçün əsas təhdidlərdən birinə çevrilir. Azərbaycanda keçirilən COP29-da iştirakçılar suya ədalətli çıxışı təmin etmək üçün su resurslarının idarəedilməsində investisiya və innovativ həllərin zəruriliyini müzakirə edirlər.
Yaşıllar Qrupunu təmsil edən nazirlər ekoloji problemlərin həllində qlobal əməkdaşlığın vacibliyini vurğulayaraq, ekoloji dayanıqlılıq və beynəlxalq təhlükəsizlik arasında əlaqəni qeyd ediblər. Onlar iqlim dəyişikliyinin resurs çatışmazlığını gücləndirdiyini və su, torpaq və qidaya çıxışla bağlı münaqişələrə səbəb ola biləcəyini vurğulayaraq bütün tərəfləri koordinasiyalı fəaliyyətə çağırıblar.
