Mövsümi viruslardan necə qorunmaq olar?

"Mövsümi viruslardan qorunmaq üçün bir sıra tədbirləri nəzərə almaq lazımdır".

Oxu.Az xəbər verir ki, bu fikirləri Səhiyyə Nazirliyinin rəsmi "Instagram" səhifəsində Səhiyyə Nazirliyinin Elmi-Tədqiqat Travmatologiya və Ortopediya İnstitutunun terapevti Günel Sadıqlı açıqlayıb.

Onun sözlərinə görə, müntəzəm olaraq, xüsusilə ictimai yerlərə getdikdən sonra əllərin sabun və su ilə yuyulması, həmçinin spirt tərkibli əl təmizləyici vasitələrdən istifadə edilməsi faydalıdır:

"Vitaminlər və minerallarla zəngin qidalar, xüsusilə C vitamini (meyvələr, tərəvəzlər) və D vitamini (balıq, yumurta) ilə zəngin qidalarla balanslı qidalanmaq, gündəlik 7-8 saat yuxu almaq bədənin immun sistemini gücləndirməyə kömək edir. Fiziki aktivlik qan dövranını yaxşılaşdırır və immuniteti gücləndirir. Stressin azaldılması, immun sisteminizin düzgün işləməsinə kömək edir. Meditasiya, yoga və ya bu kimi sevdiyiniz fəaliyyətlə məşğul olmaqda fayda var".

Terapevt bildirib ki, mövsümü viruslardan qorunmağın daha effektiv yollarından biri də qripə qarşı peyvənd olunmaqdır:

"Əhalinin sağlamlığının qorunması və qarşıdan gələn payız-qış mövsümündə gözlənilən kəskin respirator virus infeksiyalarına yoluxma hallarının qarşısının alınması məqsədilə Səhiyyə Nazirliyi vətəndaşları mövsümi qripə qarşı peyvənd olunmağa çağırır. Bununla bağlı vətəndaşlar yaşayış və ya iş yeri üzrə əhaliyə ambulator-poliklinik xidmət göstərən dövlət tibb müəssisələrinə müraciət edə bilərlər. İctimai yerlərdə hava dövranını təmin etmək virusların yayılma riskini azaldır. Xəstə insanlarla yaxın təmasdan qaçınmaq və onların yanında olmaqdan çəkinməyi tövsiyə edirik".

G.Sadıqlı sonda qeyd edib ki, bu kimi tədbirlər, mövsümi viruslardan qorunmağı asanlaşdırır.