ABŞ-də göyərtəsində sərnişinlərin olduğu təyyarə yarış trekinin yaxınlığında qəzaya uğrayıb.
Oxu.Az xəbər verir ki, bu barədə "Associated Press" məlumat yayıb.
Birmühərrikli təyyarə "Piper PA-32" yaxınlıqdakı hava limanına enmək istəyərkən Kaliforniya ştatının Los-Anceles şəhərinin mərkəzindən təxminən 50 kilometr şərqdə, "Pomona Raceway" treki yaxınlığında qəzaya uğrayıb.
Təyyarədə dörd nəfər olub. Onlardan üçü xəstəxanaya çatdırılıb, iki nəfərin vəziyyəti ağır qiymətləndirilir. Yerdə xəsarət alan olmasa da, park edilmiş bir neçə avtomobilə ziyan dəyib.
Qeyd olunur ki, həmin gün Pomonada azarkeşlərin də iştirak etdiyi avtomobil yarışının finalı olub. Qəzaya görə tədbir müvəqqəti olaraq dayandırılsa da, sonradan davam etdirilib. ABŞ Federal Aviasiya İdarəsi qəzanın səbəblərini araşdırır.
Rəylər