"Qızıl top"un Parisdə keçirilən təqdimetmə mərasimində builki qalibin adı açıqlanıb.
Oxu.Az xəbər verir ki, dünya futbolunda əsas fərdi mükafata kişilər arasında "Mançester Siti"nin ulduzu Rodri layiq görülüb.
İlin ən yaxşı qadın futbolçusu isə ikinci mövsüm ardıcıl olaraq "Barselona"nın üzvü Aytana Bonmati olub.
Kişilər arasında ilin komandası "Real Madrid" (İspaniya), qadınlar arasında isə "Barselona" (İspaniya) olub. Birincilər mərasimi boykot etdiklərindən kral klubundan səhnəyə çıxaraq mükafatı qəbul edən tapılmayıb.
Harri Keyn ("Bavariya") və Kilian Mbappe (PSJ, "Real Madrid") ilin ən yaxşı hücumçuları seçiliblər. Futbolçulara Gerd Müller adına mükafat təqdim edilib. Onlardan hər biri ötən mövsüm 52 qola imza atıb. Digər "Real" üzvləri kimi, K.Mbappe də mərasimi buraxıb.
Yohan Kroyf adına ilin ən yaxşı məşqçisi mükafatına tədbirə qatılmayan "Real Madrid"in çalışdırıcısı Karlo Ançelotti layiq görülüb.
Argentina millisinin qolkiperi Emiliano Martines ikinci mövsüm ardıcıl olaraq ilin ən yaxşı qapıçısına verilən Lev Yaşin adına mükafatı qazanıb.
Futbolun inkişafına verdiyi töhfələrə görə Sokrates mükafatı ispaniyalı qadın futbolçu Cennifer Ermosoya təqdim edilib.
İlin ən yaxşı gənc oyunçusu isə Lamin Yamal ("Barselona") olub. O, "Kopa Trophy"yə layiq görülüb.
Bu gün Fransanın "France Football" jurnalının versiyasına əsasən, 2023/24-cü illər mövsümünün yekunlarına görə dünyanın ən yaxşı futbolçusu üçün "Qızıl top" mükafatının təqdimetmə mərasimindən öncə qalibin adı və siyahı mediaya sızdırılıb.
Oxu.Az xəbər verir ki, mediaya sızdırılan xəbərdə "Real Madrid" klubunun futbolçusu Vinisius Juniyorun 630 xalla "Qızıl Top"un sahibi olacağı bildirilib. "Mançester Siti" klubunun futbolçusu Rodrinin isə 576 xalla ikinci pillədə qərarlaşdığı deyilir. İlk üçlüyü 422 xalla "Real Madrid" klubunun digər üzvü Cud Bellinqem tamamlayır.
Kilian Mbappe siyahıda 4-cü sırada qərarlaşıb. Erlinq Holand 6-cı, Lamin Yamal isə 7-ci olub.
Qeyd edək ki, mükafatlandırma mərasimi bu gecə saat 23:00-da keçiriləcək.
Bu gün Fransanın "France Football" jurnalının versiyasına əsasən, 2023/24-cü illər mövsümünün yekunlarına görə dünyanın ən yaxşı futbolçusu üçün "Qızıl top" mükafatının təntənəli təqdimetmə mərasimi keçiriləcək.
Oxu.Az xəbər verir ki, tədbir Parisdə "Şatle" Teatrında baş tutacaq.
2023-cü ildə "Qızıl top"un sahibi ABŞ-nin "İnter Mayami " klubunun argentinalı hücumçusu Lionel Messi olub.
2003-cü ildən sonra ilk dəfə olaraq mükafat uğrunda namizədlər siyahısında nə Lionel Messi, nə də beş dəfə mükafat sahibi, Səudiyyə Ərəbistanının "Ən-Nəsr" klubunun hücumçusu Kriştianu Ronaldu var.
2024-cü ildə namizədlər siyahısına 30 futbolçu daxil edilib: argentinalılar Emiliano Martines, Lautaro Martines, ispanlar Niko Uilyams, Dani Olmo, Lamin Yamal, Alexandro Qrimaldo, Rodri, Daniel Karvaxal, ingilislər Koul Palmer, Harri Keyn, Bukayo Saka, Deklan Rays, Fil Foden, Cud Bellinqem, portuqaliyalılar Vitinya, Ruben Diaş, nigeriyalı Ademola Lukman və digərləri.
Qeyd edək ki, mükafatlandırma mərasimi Bakı vaxtı ilə saat 23:15-də başlayacaq.
Rəylər