"SpaceX" şirkəti "Europa Clipper" ABŞ avtomatik planetlərarası stansiyasının uğurlu buraxılışını həyata keçirib. Stansiya Yupiterin ən sirli peyklərindən biri olan Avropaya uzun səyahətə yollanıb.
Oxu.Az-ın verdiyi məlumata görə, bu barədə "SpaceNews" xəbər yayıb.
Bildirilib ki, "Falcon Heavy" super ağır raketi "Europa Clipper"lə birlikdə Floridadakı Con Kennedi adına Kosmik Mərkəzin meydançasından start götürüb. Startdan bir saat sonra "Europa Clipper" daşıyıcının ikinci pilləsindən uğurla ayrılıb və yerüstü dispetçerlərin idarəetməsinə keçib.
"SpaceX" şirkəti "Europa Clipper" ABŞ avtomatik planetlərarası stansiyasının uğurlu buraxılışını həyata keçirib. Stansiya Yupiterin ən sirli peyklərindən biri olan Avropaya uzun səyahətə yollanıb.
Qeyd edilir ki, 5.2 milyard dollar dəyərində "Europa Clipper" NASA tarixinin ən bahalı missiyalarından biridir. Kütləsi 5700 kq (yanacaq da daxil olmaqla) olan stansiya, tam açıldıqda uzunluğunu 30.5 metrə çatdıracaq günəş batareyaları ilə təchiz edilib. Missiyada əsas hədəf Avropanın buz qabığı altında gizlənən maye su okeanının həyatı dəstəkləyə bilib-bilməyəcəyini müəyyən etməkdir.
"Europa Clipper"in Yer və Marsın cazibəsindən istifadə edərək bir sıra qravitasiya manevrlərindən sonra 2030-cu ildə Yupiter sisteminə çatacağı gözlənilir. Alimlər bu missiyanın nəzəri olaraq Günəş sistemində həyat haqqında təsəvvürlərimizi kökündən dəyişə biləcəyini vurğulayıblar.
