"Rusiya Prezidenti Vladimir Putin Kursk vilayətinə Ukrayna Silahlı Qüvvələrinin müdaxiləsindən əvvəl enerji obyektlərinə, həmçinin ticarət və mülki donanmaya zərbələr endirməkdən imtina etmək barədə Türkiyənin təklifini qəbul edib. Ancaq Kiyev belə razılaşmalara getmək istəmədi".
Oxu.Az-ın "Rossiya 24" kanalına istinadla verdiyi məlumata görə, bu barədə Təhlükəsizlik Şurasının katibi Sergey Şoyqu bəyan edib.
"Türkiyə bizə enerji obyektlərinə, atom enerjisi obyektlərinə və Qara dənizdə ticarət mülki donanmasına zərbələr endirməməyi təklif etdi... Prezidentimiz qərar qəbul etdi və dedi: "Bəli, gəlin, gəlin belə bir qərar qəbul edək". Bir müddət sonra onların (Ukrayna hökuməti) - "Yox-yox-yox, biz bu razılaşmaya getməyəcəyik", - demələri bizi xeyli təəccübləndirdi", - deyə o bildirib.
Qeyd edək ki, avqustda "The Washington Post" qəzeti mənbələrə istinadən yazırdı ki, Ukrayna Silahlı Qüvvələrinin Kursk vilayətinə müdaxiləsindən əvvəl Moskva və Kiyev münaqişənin dayandırılması üçün gizli danışıqlar aparmağı və iki ay ərzində bir-birinin enerji obyektlərinə hücum etməməyi razılaşdırmağı planlaşdırırdılar. Vasitəçi Qətər idi, nəşrin məlumatına görə, Rusiya Ukrayna hərbçilərinin Kursk vilayətinə hücumu fonunda prosesi dayandırmağa qərar verib.
Rusiya Xarici İşlər Nazirliyi bu cür danışıqlar barədə məlumatı təsdiqləməyib.
Xatırladaq ki, avqustun əvvəlində Ukrayna Silahlı Qüvvələri Kursk vilayətinin sərhədyanı rayonlarına daxil olub, o vaxtdan bəri orada döyüşlər gedir. Müdafiə Nazirliyi ayrıca hesabatda Ukrayna qüvvələrinin regiona zərbələrinin dəf edilməsi və onların Rusiya ərazisinə daha dərinə nüfuz etmək cəhdləri barədə məlumat verir.
Rusiya Prezidenti Vladimir Putin Kiyevin hərəkətlərini genişmiqyaslı təxribat adlandırıb və Ukrayna Silahlı Qüvvələrinin əməliyyatının uğursuz olacağına əminliyini ifadə edib. Təhlükəsizlik Şurasının katibi Sergey Şoyqunun sözlərinə görə, Ukrayna Silahlı Qüvvələri Rusiya ərazisindən çıxarılmayana qədər Moskva Kiyevlə danışıqlar aparmayacaq.
