Ukrayna Prezidenti Volodimir Zelenski və ABŞ-nin Respublikaçılar Partiyasından prezidentliyə namizəd Donald Tramp Nyu-Yorkda "Trump Tower"də görüşüblər. Görüş bir saata yaxın davam edib.
Oxu.Az xəbər verir ki, bu barədə "Eurointegration" nəşri məlumat yayıb.
Ukrayna lideri qeyd edib ki, görüş ABŞ-də prezident seçkisi ərəfəsində keçirilir. Onun sözlərinə görə, noyabrdan sonra Kiyev və Vaşinqton arasında birgə addımların müzakirəsi artıq vacibdir.
Sentyabrın 26-da Zelenski Demokratlar Partiyasından dövlət başçısı vəzifəsinə namizəd olan ABŞ-nin vitse-prezidenti Kamala Harrislə görüşüb.
Öz növbəsində, Tramp seçkidə qalib gələrsə, Ukraynadakı müharibə ilə bağlı məsələni tez bir zamanda həll edəcəyi bəyanatını təkrarlayıb.
Xatırladaq ki, bu, Zelenski ilə Tramp arasında son beş ildə ilk şəxsi görüşdür.
Ukrayna prezidenti sentyabrın 22-dən ABŞ-dədir. O, BMT-nin Baş Assambleyasının 79-cu sessiyasında çıxış edib və həmçinin Rusiya ilə müharibədə "qələbə planını" ABŞ Prezidenti Co Baydenə təqdim edib.
Rəylər